‘Chalk and Duster’

மிகச் சமீபத்தில் நான் பார்த்த படங்களில் ‘Chalk and Duster’ என்னைக் கவர்ந்ததாக இருக்கிறது. ஆசிரியர்களைக் கௌரவித்து வந்திருக்கும் இந்திய திரைப்படங்கள் வரிசையில் chalk and duster படத்திற்குத் தனியிடம் உண்டு. அதே வேளையில் ‘How Old Are U’ (மலையாளப் படம்) ‘Queen’ (இந்திப்படம்) வரிசையில் ‘Chalk and Duster’ பெண்களுக்கான மற்றுமொரு படம் என்றுதான் என்ன தோன்றுகிறது.
ஆசிரியர் பணி என்பது மகத்தான பணி என்பது மாறி அது ஒரு கௌரவமான தொழில் என முத்திரை குத்தப்பட்டுள்ளது. ஆசிரியர் தொழில் அதிக மன உளைச்சல் கொடுக்கும் தொழிலில் முதலிடத்தைப் பெற்றுள்ளது இந்த நூற்றாண்டில் ஆசிரியர்களுக்குக் கிடைத்த மிகப்பெரியசாபம். அதுவும் ஆசிரியைகளுக்கு அது இன்னும் உளவியல் பிரச்னையைக் கொடுக்ககூடியதாக அமைந்துவிட்டது.
கல்வியமைச்சின் புதிய சட்டத்திட்டங்கள், அதிக அலுவலக வேலைகள், பிரத்தியேக வகுப்புகளில் பங்களிப்புகள் என ஆசியர்கள் அதிக நேரத்தை செலவிடுகிறார்கள். பள்ளி முடிந்த பிறகுகூடக் கேள்வித் தாள்கள் திருத்துவது, சோதனைத் தாள்களைத் தயார் செய்வது தவிரவும் பரிசளிப்பு விழா சில போட்டி விளையாட்டுகள் உள்ளிட்ட விஷயங்களுக்கு மாணவர்களைத் தயார் செய்வது என ஆசிரியர்களின் பங்களிப்பைச் சொல்லிக்கொண்டே போகலாம்.
ஆனால், ஆசிரியைகளுக்குப் பள்ளியை தவிர்த்துக் குடும்பப் பொறுப்புகள், வீட்டு வேலைகள் பராமரிப்புகள் எனக் கழுத்துவரை பொறுப்புகள் இருக்கின்றன. அது அனைத்தையும் தாண்டிதான் அவர்கள் சிரிக்கவும் சிந்திக்கவும் வேண்டியுள்ளது. இதற்கிடையில் ஏற்படும் சங்கடங்களை ஆசிரியைகள் எப்படி எதிர்கொள்கிறார்கள் என்று கேட்டால், யாருக்கும் ஆசிரியராகும் ஆசை வராது.
பள்ளியில் அதிக நேரத்தை செலவழிக்கும் ஆசியர்களுக்குப் பள்ளி நிர்வாகமே பிரச்னையானால் அந்த ஆசிரியர்களுக்கு ஏற்படும் சிக்கல் எவ்வளவு பெரிய தாக்கத்தைக் கொடுக்கும் என்பதை ‘Chalk and Duster’ திரைப்படம் பேசியிருக்கிறது. மேலும் ஆசிரியர்களின் Smart Teaching, குழந்தைகள் நிலைக்கு இறங்கி அவர்கள் உலகத்திற்குள் போய் அவர்களுடைய மனதில் இடம்பிடிப்பது என ஆசிரியர்களைவிட ஆசிரியைகளுக்கு மிக எளிதாக அமைந்துவிடுகிறது. ‘Taare Zameen Par’ உள்ளிட்டபடங்களில் வரும் ஆசிரியர்களுக்கு மாணவர்களிடத்தில் அதிக அன்பை செலுத்துவதுபோல இருந்தாலும் அதற்கு நிறைய உழைக்கவேண்டியுள்ளது. அமீர்கான் மாதிரியான ஆசிரியர்களையும் சாட்டையில் வரும் சமுத்திரகனியைப் போன்ற ஆசியர்களைத் தேடிதான் பிடிக்கவேண்டியுள்ளது. Jayant Gilatar இயக்கிய ‘Chalk and Duster’ திரைப்படம் ஆசிரியர்களுக்குப் புதிய உத்வேகம் குறிப்பாக ஏழைப்பள்ளிகளில் வசதிகுறைவான இடத்தில் வேலை செய்யும் ஆசிரியர்களுக்கு ஒரு நிமிடமாவது நம்பிக்கையை ஏற்படுத்தியிருக்கும். ஜோதி பாத்திரத்தில் நடித்திருக்கும் ஜுஹி சவ்லா, வித்யா பாத்திரத்தை ஏற்று நடித்த ஷாபனா அஸ்மி பிரதான பாத்திரங்களாகத் திரையில் வந்தாலும் சிறிய சிறிய பாத்திரங்களை ஏற்று நடித்திருந்த அனைவருமே திரைக்குக் கனம் சேர்த்துள்ளனர்.
மலேசியாவில் ஆசிரியர் தினத்திற்காகச் சிறப்புத் திரைப்படமாகத் தொலைக்காட்சியில் ஒளியேற்றும்போதுதான் அந்தப் படத்தை நான் பார்த்தேன். ஆசிரியர்களுக்கு ‘Chalk and Duster’ நல்ல பரிசுதான். மேலும், ஆசிரியைகளுக்கு நம்பிகையையும் கொடுத்திருக்கும் என நம்புகிறேன்.