எனக்கு தெரியவில்லை

என் பூமி சில தினங்களுக்கு முன்புதான்
உதிர ஆரம்பித்திருக்க வேண்டும்
சரியாகத் தெரியவில்லை

அது இரத்தத்தாலும் நாணங்களாலும் ஆனதால்
உதிரும் முன்
ஏதாவது சமிக்ஞைக் குறிகளையாவது காட்டியிருக்கலாம்

என் கண்ணாடித் தளவாடத்தில்
அழுக்குப் படியும்போதும்
கணவர் பரிசளித்த பொருளொன்று
களவு கொடுத்த போதும்
அம்மா சீதனித்த இரட்டைப் பாத்திரத்தில் ஒன்று
கைநழுவிய பொதும்
என் படுக்கையறை மற்றும் கழிப்பறை
அந்நியப்பட்டிருந்தபோதும்
என் பூமி உதிர தொடங்கியிருக்கக்கூடும்

எனக்கு சரியாகத் தெரியவில்லை

என்னால் கைவிடப்பட்ட பூமி
திட்டுத் திட்டாக உதிர்ந்து
என் நண்பர்களுக்கு வானமாகவோ
அல்லது வேறு யாருக்காவது
மற்றொரு பூமியாகவோ மாறியிருக்கலாம்

எனக்கு மிகச் சரியாக எதுவும் தெரியவில்லை

-யோகி